D Sari isch ganz neu zue uns zooge. S isch e Triumph Speed 400 und me kaa sy mit em glaine Billjee (<35KW) faare. Sy isch e wändige, hübsche Wirbelwind und goot drotz em eenter glaine 400ccm-Motor mit Freud d Basstross uffe. Nadürlig isch sy nit mit eme hochpotänte Strösseler z verglyyche - aber ganz eerlig - wär brucht das?

E Vordail isch au s dieffe Gwicht! Grad emool 170 kg drugge se uff e Bode. Zämme mit ere niidrige Sitzbangg vo 79cm isch sy au für glaineri Lüt (ab 1.60 goots sicher, drunter kunnts uff d Fähigkaite aa) oder Aafänger dr perfäggt Döff.

S darf durchus au e lengerfrischtigi Vermietig syy, für Lüt wo kai aigene Döff könne oder wänn kaufe aber gärn s Billjee mache möchte. D Konditione für e lengerfrischtigi Vermietig ka me denn bilateral abmache…

Au wenn Du dr Leerfaaruswyys ganz früsch hesch und nonie (oder fascht nie) sälber Döff gfaare bisch, darfsch dy bi mir für e Mieti vo dr Sari mälde. Denn mache mer aber vorhär geegene glaine Obolus (dä diemer denn no abmache) en Yyfierig ins Döff faare uff eme Parggblatz, bis y überzügt bi, dass de dr Döff sicher duure Strosseverkeer faare kasch.